Домой Блог

Эркиндикте эки төңкөрүш жасаган Атамбаев түрмөдө жатып эки төңкөрүш жасайбы?

17-сентябрда экс-президент Алмазбек Атамбаевдин 65 жашка чыкканына байланыштуу тарапташтарынын митингги болбой калды. Уюштуруу комитетинин мүчөсү Рыскелди Момбеков ар кандай чагымдардан корктук дегендей ишаарат кылды. Көрсө, Атамбаевди абактан чыгарууну талап кылган митингдин болбой калганына, акүй менен көкүйдүн барыңарды четиңерден камайбыз деген коркутуусу себеп болуптур.

Жер тыңшаар маамыттардын айтуусунда бийликтин колунда Алмазбек Атамбаевдин түрмөдөгү сөздөрү бар экен.

Абакта эки жылдан бери жаткан Атамбаев кирген-чыккандарга “эркиндикте жүргөндө эки революция жасагам, түрмөдө жатып дагы эки революция жасаганга күчүм жетет. Бирөөнү былтыр жасадым”,- деп мактанат имиш…

Чынында 2005-2010-жылдары революциянын мотору Атамбаев болгон эмеспи. Ал эми 2020-жылкы төңкөрүшкө жеткирген Жээнбеков-Матраимовго нааразылык арыгын Атамбаев чаап бергенин кантип танабыз.

Жолдошова: Жугунду ичип семирген сендей, көздөрүн байлап, көрсөтпөйт жолду

Жогорку Кеңештин мурдагы депутаты Жылдызкан Жолдошова президент Садыр Жапаровдун тарапташы Бекзат Өмүрбековдун ырына ыр менен жооп кайтарыптыр.

Жолдошова аны арам акчага буйрутма аткарбоого чакырып: “Мен  көргөндү сен көрө элексиң. Чыныгы эркек “грузчик” болуп иштесе дагы үй-бүлөсүн ак эмгеги менен  багат”, – деп кошумчалаган.

Бекзат Өмүрбековго арналып жазылган ырдын текстин өзгөртүүсүз беребиз.

Ырыңа жоопту берейин балам,

Тынчысын сенин тынч эмес санааң.

Жылдызым өчпөс мен тирүү кезде,

Жылдыздай бийик, күйүп бир жанам.

Ажого айттым акыйкат, чындык,

Болбосун деп эртең бир жаман.

Кошомат кылып тоюушат ашка,

Ток эмес жүрөт сендейлер ачка,

Жалданган жалчы, чындыкты бурат.

Жамандап баарын жар салып калкка.

Камандар курчап, казышат орду,

Дайыма буруп шыкактайт солду.

Жугунду ичип семирген сендей,

Көздөрүн байлап, көрсөтпөйт жолду.

Баламды айтып, кейидиң Бекзат,

Ал чоң эмес, кичине кызмат.

Убайым тартып таарынган жокмун,

Себеби ошол таарынды деген,

Ал сен жазган, келжирек ушак.

Он бир жыл колдоп, кесиптеш болдум,

Тарбия берип, тазасын ойдун.

Чыркырап турдум  чындыкты айтып,

Тартса да канча азабын тордун.

Баш үйрүп баары кеткен бир кезде,

Сатпадым аны жанында болдум.

Ошондо кайда жүрдү элең кыйын,

Жугунду ичкен жугундукорум.

Мен душман эмес Садырга болчу,

Көрсөтүп ага түз, туура, оңду.

Өлкөбүз үчүн күйүп мен айтам,

Баспасын деп  баягы жолду.

://www.facebook.com/100062544220488/posts/186175860143887/?d=n

 

Уу коргошун ичип жүргөн министр коронавирус менен ооруп жатат

Сүрөт: live.kg

Саламаттык сактоо жана социалдык өнүктүрүү министри Алымкадыр Бейшеналиев COVID-19 инфекциясына чалдыкканын  kaktus.media сайтына билдириптир.

“Мен деле адаммын. Эки күн мурун өзүмдү жаман сезип жаткам, бүгүң абалым жакшы. Эртең андан да жакшы болот. Мен уу коргошун гана ичип жатам. Иш бөлмөмдө обочолонуп, аралыктан иштеп жатам. Анткени, азыр иштей турган убак”,  – деген ал.

Министр мырзага ден соолук каалайбыз, бирок аты жаман оору өлкөдө күчөп турган чакта коронавирустан айыктыра турганы далилденбеген уу коргошунду кайра-кайра жарнама кылганын кандай түшүнсөк болот? Вакцина сатып алууга бюджетен каражат бөлүнсө дагы келишимдер түзүлбөй, ишти кечеңдетип жаткандыгы үчүн жакында эле Улукбек Мариповдон жеме укту. Буга чейин жалаң калптары менен элге таанылган министр креслосун кучактап жүрө бербей, иштин көзүн билген жаштарга орун бошотуп бербейби? Президенттин канатына качанкыга чейин калкаланып отура берет?

Атамбаев бийликтеги эки доско ат койду

Абакта жаткан мурдагы президент Алмазбек Атамбаевге депутаттар ат тезегин кургатпай кирип чыгууда. 2019-жылдын август айынан бери күн көрбөй УКМКнын абагында жаткан Атамбаев 47-колонияга көнө түшкөнүн айтышууда.

Лакап ат коюу боюнча астына адам салбаган Атамбаев азыркыларды “заправщиктер” деп коет экен. “Акаев, Бакиевден коркпогон “заправщиктерден” коркомбу”, – деп отурат дейт. Эске салсак, Садыр Жапаров менен Камчыбек Ташиев ишкерлигин канистр менен бензин сатып башташкан, кийин май куюучу заправкаларды иштеткени белгилүү.

Атамбаев учурдагы коомдук-саясий абалдан жакшы кабардар. Президент Садыр Жапаровдун “Атамбаев алып кеткен Кытай карызынан кутулбасак стратегиялык объекттерден айрылып калабыз”, – деп коомчулуктун үрөйүн учуруусуна жооп кылып АкиПресс сайтына “Что мешает плохому танцору?” деген тышкы карыздар боюнча кеңири макаласын жарыялады.

Анда Алмазбек Атамбаев “Четтен алынган кредиттер “Датка – Кемин, Түндүк – Түштүк жолу, Бишкек ТЭЦи сыяктуу ири улуттук-стратегиялык объекттерди курууга, Токтогул, Ат-Башы ГЭСин реконструкциялоого кеткенин, эгер алар салынбаса Кыргызстан энергетикалык көз карандылыкта калмактыгын айткан. Ошондой эле Атамбаев жогорудагы улуттук-стратегиялык объекттерди салуу үчүн анын президенттик тушунда 2 млрд долларга жакын карыз алынган менен Россия, Түркия, Германиянын астындагы 554 миллион доллар карызды кечтиргенин жазган.

Алмазбек Атамбаев ал ажолук кылган 6 жыл ичинде 3.5 млрд доллар грант келгенин, ошол эле Кытай 400 миллион доллар бекер жардам кылганын, Атамбаев учурунда түзүлгөн келишимдин негизинде Кытай грантынын эсебинен Бишкектин жолдору быйыл дагы оңдоло турганын айткан.

“Дары болсун” Төрөбаевге Акаев “укол” сайды

Жогорку Кеңеште жаңы Конституциянын долбоорун референдумга алып чыгуу боюнча мыйзам каралууда. Жыйын учурунда бийликчил депутаттар менен оппозиция регламентти сактоо боюнча талаша кетти. Депутаттар Бакыт Төрөбаев, Өмүрбек Бакиров, Үмөтаалы Кыдыралиев, Мирлан Бакиров адатынча бийликтин долбоорун апендинин кызындай мактап, регламентти качан эле сактап жүрдүк эле дегенсишти…

Депутат Жанар Акаевдин ар келген бийликке кошомат кыласыңар деген сөзүнө тээриккен Бакыт Төрөбаев триубанага чыгып “Атамбаевдин баласысың” деди эле Жанар Акаев “сыныма чычаласаңыз, дагы бир жолу дары болсун”,-деп жайлады.

Эки адам шашылыш депутат болду

Шайлообек Атазов менен Бурун Аманова Жогорку Кеңештин депутаты мандатын алды. Алар “Ата Мекен” фракциясында бошогон эки орунга депутат болуп келди.

Борбордук шайлоо комиссиясы эс алуу күнү болгон жекшембиге карабай эки депутатка мандат бериши таң калууну жаратууда. Көрсө БШКнын шашылыш мандат беришинин сыры бийлик “Референдум жарыялоо тууралуу” мыйзамды үч окууда кабыл алуу үчүн парламенттеги 6 фракциянын макулдугун алыш керек болгон. Бирок, Ата Мекен партиясында жетиштүү добуш топтой албай калып, Шайлообек Атазов менен Бурун Аманаовага эс алуу күнүнө карабай мандат тапшырышты.

 

 

Темирбек Асанбеков: Мигранттар ажону атасын сыйлагандай сыйлаш керек

Бүгүн жаздын биринчи күнү эмеспи, жазда адамдарга сүйүү гана келбей желдеп да калат. Мекен Ынтымагы партиясынын лидери Темирбек Асанбековдун Президент Садыр Жапаровго сүйүүсү ойгонгонбу же бир аз желдеп калганбы, айтор, бүгүн таң эрте Биринчи радионун түз эфиринде мигранттар жөнүндө сүйлөп жатып, “Мигранттар ажону атасын сыйлагандай сыйлаш керек”,-деди.

Бюджети жыртык Кыргызстанга жылына 2 млрд доллар которуп, мекенинен алыста тентип жүргөн мигранттар эмнеге ажону атасын сыйлагандай сыйлаш керек экени түшүнүксүз. Чачылганды курай албай, ууруларды сурай албай, бир ууч кыргызды дүйнөнүн төрт тарабына таруудай тараткан ажолор эмеспи?

Темирбек Асанбековдун октябрь окуяларынан кийин бийликке келген Президент Садыр Жапаровго жагынуусу биринчи жолу эмес. Ал буга чейин Баткендеги чегара чатагын чечүүнү талап кылып митингге чыккандарды “Эми Баткен аймагынын эли акүйдүн астына келип жаңжал чыгарып жатса түшүнөт элем, кыйкырып жаткандардын ичинде Бишкекте жашаган, чегарага тийешеси жок адамдар эле саясий курал катары көтөрүп жатканын көрүп жатабыз”, – деген эле Темирбек Асанбеков.

Шайлоомен каймана аты бар Темирбек Асанбековдун ыңгайы келсе-келбесе да Президентке жагынуусунун сыры да белгилүү болуп калды. Көрсө Асанбеков Кыргызстандын ЕАЭБдеги бир министрлигин сурап жаткан экен.

Укмуштуунун төөсү жорго дегендей, Иса Өмүркуловчосунан “аталабай” эле кызматка барса болбойбу? Таң каласың…

Матраимов камалып, “Ынтымак” ыдырап баштадыбы?

Жогорку Кенештин депутаты Марлен Маматалиев башында турган “Ынтымак” партиясы туулбай жатып тууна чөккөнү калды. Бул партияны коомчулук Матраимовдордун долбоору катары таанып баштаса, негизги “демөөрчү” камалган соң партиянын акыбалы оорлой түшкөнсүйт.

Өзгөчө “Ынтымакты” Ош калаасына таанытып, шаардык шайлоого даярдап жаткан дагы бир депутат Нурбек Алимбеков партиядан чыга качканы айтылууда. Алимбековго УКМКдан сигнал келип, Камчыбек Ташиевдин бул партияга көзү түз эмес экени, алдыдагы жарышта акча таратуу айыбы менен бир нече шаарлардан шайлоо жарышынан четтетилери айтылганын ички булактарыбыз билдирди. Ал эми Матраимовдор бул партияны каржылоосун улантабы же токтотобу, азарынча белгисиз.

Ушул эле партиянын дагы бир демөөрчүсүнө Нарында аткезчилик боюнча кылмыш иш даярдалып жатканы тууралуу дагы кептер бар. Камчыкенин каарына калган ашкере “шустрый” балдар чоң саясат менен ойнойм деп жатып, эрте эле белдерин сындырып алышпаса болгону.

Максат ажы Токтомушев муфтийликке талапкерлигин коет

Максат ажы Токтомушев муфтийликке талапкерлигин коет. Бул тууралуу өздүк булактардан белгилүү болду. Ал мындай ниетин кечээ 21-февралда тарапташтары менен жолукканда айткан. Эске салсак, Кыргызстандын экс-муфтийи Максат ажы Токтомушевди УКМК 10-февралда камакка алып, сот аны үй камагына чыгарган.

Муфтияттын башкы бухгалтери 100 миң доллар пара берип жатканында кармалганын жарыялаган.

Муфтияттын айланасындагы чыр-чатак алдыда боло туган муфтий шайлоого байланыштуу тутанганы айтылууда. Дин иштери боюнча президенттин алдындагы мамлекеттик комиссиянын экс-жетекчиси Акин Токталиев муфтий шайлоого Президент Садыр Жапаровдун кеңешчиси Арзыбек Бурканов аралашып жатканын айтып чыкты. Президент Токталиевдин айткандарын четке кагып, муфтияттагы каржылык мыйзам бузуулар боюнча интервью берген.

Муфтий Максат Токтомушев кызматтан кетти

Кыргызстандын муфтийи Максат ажы Токтомушев отставкага кетти. Бул тууралуу өздүк булактар кабарлады.

УКМК 9-февралда муфтияттын башкы бухгалтерин кармап, камакка алды. Ал финансылык мыйзам бузууларды жабуу үчүн УКМК кызматкерлерине 100 миң доллар пара сунуштап, берип жаткан жеринен кармалган. Муфтият ажыга баруучулар чогулткан акчаны процентке берип иштеткени аныкталган.

Кечээ Максат ажы Токтомушев АкиПреске интервью берип, Президенттин айланасындагы адамдар аны кызматтан кетирүүгө аракет кылып жатат деген эле.